Publicacións

Eira Vella edita un libro do exiliado betanceiro Luis Cortiñas

O vindeiro 14 de abril a A.C. Eira Vella presentará o libro “Traizón consagrada. A gran derrota do pobo hispano” do avogado e republicano betanceiro Luis A. Cortiñas Díaz falecido na Arxentina en 1986. O acto terá lugar ás oito e media da tarde na sala Azul do edificio Arquivo.

O autor, nado en Betanzos en 1900, era fillo do farmacéutico Ricardo Cortiñas instalado na céntrica Praza do Campo nunha casa que foi embargada polo réxime franquista. Luis formou parte e presidiu a Irmandade da Fala de Betanzos, posteriormente foi membro da O.R.G.A., logo integrada en Izquierda Republicana. Licenciado en Dereito, exerceu a avogacía en Betanzos e na Coruña. Preso a raíz do golpe militar en 1936, foi condenado a trinta anos de prisión e estivo cumprindo condea ata 1941 na cadea de Pamplona. Ao sair do cárcere exiliouse na Arxentina, onde tiña moita familia, revalidando e desenvolvendo a súa carreira de avogado. Alí publicou em 1958 este libro que apenas é coñecido entre nós e que agora se publica en lingua galega arrequecido cunha introducción de Xesús Torres e diverso material gráfico. Nel, o autor, fai un repaso polas penalidades que sufriu a raíz do golpe militar do 18 de xullo de 1936, co seu xuízo e prisión durante catro anos e, polo medio, vai tranzando a súa interpretación da historia de España nos últimos séculos e as impresións dos acontecementos máis recentes naqueles tráxicos momentos.

Actividades, Publicacións

Os libros prestados…

present3

É o título da última novela de Xabier López López que se presentou 0nte, 17 de setembro,  en Betanzos. O autor estivo acompañado no acto por Carlos Lema, polo escritor Santiago Jaureguízar e Gabriela Rodríguez, presidenta da asociación.  O público asistiu ó intercambio de impresións e comentarios sobre a novela por parte dos participantes na mesa.  Unha novela centrada na relación que nós temos cos libros, facendo referencia ao propio título,  que  ben podería ser as vidas prestadas,  segundo verbas do seu autor. Dende a asociación queremos darlle os  nosos parabéns a Xabier.

present2present8

present5present1

Consultar reseña sobre o libro.

Enlace ao blogue de Galaxia, no que o autor realiza anotacións durante este mes sobre “Os libros prestados”.

Actividades, Publicacións

Presentouse Espertar…

…onte presentouse no edificio Arquivo de Betanzos o libro “Espertar” de Lino García e Helena Robledo. O acto estivo presentado por Gabriela e nel interviron Xabier López, autor do prólogo, e os autores. O numeroso público que encheu a sala tamén disfrutou dunha mostra da arte poética e fotográfica de Lino e Helena a través da proxección dun vídeo. Un libro para “ler e ver”, que combina verbas e imaxe para amosar unha parte do universo dos seus creadores. Esta obra é o terceiro número da colección Xanela da poesía que edita Eira Vella AC.
A continuación, ofrecemos algunhas imaxes do acto.

 

 

Publicacións

Uxío Novoneira

Como ben saberedes, este ano 2010 o Día das Letras Galegas estará adicado ao poeta Uxío Novoneira, o poeta do Caurel. Quixemos lembralo cun fermoso poema que adicou a Betanzos.

POEMA DOS CANEIROS
Betanzos, 1955
MANDEO inorde ó son da noite.

As ondas do río devalaban lenes
levando as barcas soltas pro infindo do mar i a noite.
Sobor das barcas:
as mulleres! o viño! as viandas!

As ondas do río devalaban lenes
levando as barcas soltas pro infindo do mar i a noite.

Comemos e bebemos pra ledicia.

As ondas do río devalaban lenes
levando as barcas soltas pro infindo do mar i a noite.

O viño i as viandas érguenme á lua chea.

As ondas do río devalaban lenes
levando as barcas soltas pro infindo do mar i a noite.

Cando o viño roxo que non perde a coor no cor
xa non abondaba a nosa sede
chegámol´os beizos a vasos máis fondos.

As ondas do río de levalaban lenes
levando as barcas soltas pro infindo do mar i a noite.

As mulleres eran verdadeiras como o viño.

As ondas do río devalaban lenes
levando as barcas soltas pro infindo do mar i a noite.

A medida que o tempo pasaba alongábame da morte.

As ondas do río devalaban lenes
levando as barcas soltas pro infindo do mar i a moite.

No milagre longo coidei seguir nas barcas devalando.

Uxío Novoneira

En: “ Betanzos na voz dos poetas”. 1994